تركض غزالة حافية بضوّ القمر ..
حتى تمسّيكي
بس تحلم منامات كشّفها الهوى ..
نومِك يغطيكي
وصل الخبر عا مصر ..
وقفو ملوك النيل يتأهّلو فيكي
صوتك مرق يا طير قلّو يسلّم عليي
ما صدّقت إنّو مرق تا نشفت الدمعة بعينيّي
كنت تقلي غنّيلي .. غنّيت ما في حدا
وينك طِلّ مقابيلي .. صوتك صاير صدى
صوتك
خدني معك
ع مين تاركني
قللو
أنا هربان من هــ الموت
والموت لاحقني
وما عاد رجع الصوت .
من بياع الزمن
بيتي
متل ورقة احترق
ما عاد عندي أهل
شبهتك بهاالسهل
بقرص العسل
عملو ع مهلوا النحل
شبهتك بحالك
بالعمر
ماشي وراك يلملم خيالك
وجك طقس متل الصحو
دايخ ومش سكران
متل الشتي
نازل على حزيران
شبهتك بقوس القدح
جايي على لبنان
وجِّك وطاف النيل
غرّق مصر
في مملكة عم تنسرق
مفتوح باب القصر
وجّك
من هون بيحدو الشتي
ومن هون حده التلج
وشاعر
حمل حاله بـ هالموت وحده وهج
شبهتك بكل الدني
من بعدك عليها السلام
بس تفرحي
بيطير من صدري الحمام
وبس تزعلي
ع مصر باخدلك الشام
طقس
مدري شو صابو ، هالعمر
فتّح وصار قمار
يا ريت هالعمر الهرب
يرجع ونحنا زغار
لا بعود اقرا بها الكتب
ولا بعود عمّر دار
بقشّقش حوالييّ حطب
وبشعّل بها النار
حبّ
ما لحقت قلّن بعد بسم الله
تا خلصت الآية
تركت خلفي الميم
ومشيت لحالي
طول الطريق
الـ بين رحمن ورحيم
ميم
هـ الأرض جاي مرنحة
بتهزّ ع الميلين
ع كتر ما هي خفيفه
بيحملوها تنين
وزغيّره
طير الحمام بيقطعا بيومين
ع قد منا زغيّرة
خمنتها بعدين ..
جبتلّها شمس وقمر من سكر
ونجمات زرقا معلّقا
بترد عنها العين
ع كثر ما صوتها حِلو
بيلبق لها إسمين
دقت على باب الزمان
مضيّعه ليلين
تتسألو ان كنن إلو
قام ضيّفا نهارين
وقللي الزمن ما تقلّها
صاروا كحل بالعين ..
كحل بالعين
